Revolt RV1 Electric Motorcycle : देशातील आघाडीची इलेक्ट्रिक टू-व्हीलर उत्पादक रिव्हॉल्ट मोटर्सने अधिकृतपणे आपली पहिली इलेक्ट्रिक बाईक Revolt RV1 प्रवासी विभागात विक्रीसाठी लाँच केली आहे. ही बाईक एकूण दोन व्हेरिएंटमध्ये सादर करण्यात आली आहे. त्याच्या बेस व्हेरिएंटची सुरुवातीची किंमत 84,990 रुपये (एक्स-शोरूम) ठेवण्यात आली आहे.
भारतात विकल्या जाणाऱ्या सर्व दुचाकींपैकी 70% बाईक आहेत आणि प्रवासी विभागात दरवर्षी 80 लाखांहून अधिक गाड्यांची विक्री होते. रिव्हॉल्ट मोटर्सने RV1 सह मोठ्या क्षेत्रात प्रवेश केला आहे. कंपनीच्या पोर्टफोलिओमधील ही सर्वात स्वस्त बाईक आहे. कंपनीने अधिकृत बुकिंगही सुरू केले आहे. ग्राहक हे कंपनीच्या अधिकृत वेबसाइटवरून आणि अधिकृत डीलरशिपवरून फक्त 499 रुपयांमध्ये बुक करू शकतात.
RV1 त्याच्या प्रीमियम प्रकार RV1+ सह चार रंगांमध्ये उपलब्ध आहे, जो RV1 साठी 84,990 रुपये आणि RV1+ साठी 99,990 रुपयांपासून सुरू होतो. दोन्ही प्रकार मुळात RV मालिकेवर आधारित आहेत आणि त्यांच्या लुक आणि डिझाइनमध्ये थोडा फरक आहे. पण त्यांच्या बॅटरी पॅक आणि रेंजमध्ये मोठा फरक आहे.
लूक आणि डिझाइन
या बाईकचा लूक आणि डिझाईन कंपनीच्या आधीच्या RV300 मॉडेल प्रमाणे आहे. यात गोल आकाराचा एलईडी हेडलाइट आहे. याशिवाय इंडिकेटर आणि लायसन्स प्लेट्समध्येही एलईडीचा वापर करण्यात आला आहे. रुंद टायर्स, ड्युअल-डिस्क ब्रेक, पोर्टेबल वॉटर प्रूफ बॅटरी, एलसीडी डिस्प्ले, रिव्हर्स मोड या बाईकला आणखी चांगले बनवतात.
बॅटरी-पॅक आणि ड्रायव्हिंग रेंज
कंपनीने बेस मॉडेल म्हणजेच RV1 मध्ये 2.2 kW क्षमतेचा बॅटरी पॅक दिला आहे. तर RV1+ मध्ये 3.24 kW चा बॅटरी पॅक आहे. त्याचा छोटा बॅटरी पॅक एका चार्जमध्ये 100 किमीची ड्रायव्हिंग रेंज देतो आणि मोठा बॅटरी पॅक एका चार्जमध्ये 160 किमीची ड्रायव्हिंग रेंज देतो. कंपनीचे म्हणणे आहे की, ही बाईक एका मजबूत फ्रेमवर बनवण्यात आली आहे जी जास्तीत जास्त 250 किलोपर्यंतचा भार वाहून नेण्यास सक्षम आहे.
चार्जिंग आणि टॉप स्पीड
दोन्ही बाईकचा टॉप स्पीड 70 किमी/तास आहे. तथापि, RV1 बॅटरी 0 ते 80 टक्के चार्ज होण्यासाठी अंदाजे 2.15 तास लागतात. तर RV1+ ची बॅटरी 3.30 तासात 80 टक्क्यांपर्यंत चार्ज होऊ शकते. RV1 चे वजन 108 kg आहे तर RV1 Plus चे वजन 110 kg आहे. कंपनीने दोन्ही बाईकमध्ये 240 mm डिस्क ब्रेक दिले आहेत.
हेही वाचा – भारतात पुन्हा येणार Ford कंपनी? तामिळनाडू प्लांटसाठी ‘हा’ प्लॅन, वाचा!
सस्पेन्शन
Revolt RV सीरिजमध्ये कंपनीने समोरच्या बाजुला टेलिस्कोपिक फोर्क सस्पेन्शन आणि मागील बाजूस मोनोशॉक सस्पेन्शन दिले आहे. त्याची सीटची उंची 790 मिमी आहे, याचा अर्थ ही बाइक सरासरी उंचीच्या लोकांसाठीही चांगली आहे. याचा व्हीलबेस 1350 मिमी आहे. याशिवाय सिंगल पीस लाँग सीटवर दोन व्यक्ती सहज बसू शकतात.
वॉरंटी
रिव्हॉल्ट मोटर्स या बाईकवर 5 वर्षे किंवा 75,000 किमीची वॉरंटी देत आहे. याशिवाय चार्जरवर 2 वर्षांची वॉरंटी दिली जात आहे. तुम्ही या बाईकची बॅटरी तुमच्या नेहमीच्या घरगुती सॉकेटला जोडून चार्ज करू शकता.