Citroen : सिट्रोएनने युरोपमधील त्यांच्या C3 आणि DS3 मॉडेल्सबाबत एक मोठा इशारा जारी केला आहे. कंपनीने या मॉडेल्सच्या मालकांना त्यांच्या गाड्या ताबडतोब चालवणे थांबवण्याचा सल्ला दिला आहे. एअरबॅग फुटल्याने एका महिलेचा मृत्यू झालेल्या अपघातानंतर ही चेतावणी देण्यात आली आहे.
कंपनीचे म्हणणे आहे, की या गाड्यांमध्ये ताकाटा कंपनीचे दोषपूर्ण एअरबॅग्ज असू शकतात, जे अपघातादरम्यान स्फोट होऊ शकतात आणि धोकादायक ठरू शकतात. आता प्रश्न उद्भवतो, की भारतातील सिट्रोएन C3 च्या मालकांनीही काळजी करावी का? चला सविस्तर जाणून घेऊया.
संपूर्ण प्रकरण काय?
सिट्रोएनने युरोपमधील C3 आणि DS3 कारबाबत एक गंभीर इशारा जारी केला आहे, ज्यामध्ये सुमारे 4.41 लाख गाड्यांवर “स्टॉप ड्राइव्ह अलर्ट” लागू करण्यात आला आहे. यामागील कारण ताकाटा कंपनीचे दोषपूर्ण एअरबॅग्ज आहेत, जे अपघातादरम्यान स्फोट होऊ शकतात आणि प्राणघातक ठरू शकतात. अलीकडेच फ्रान्समध्ये या कारणामुळे एका महिलेचा मृत्यू झाला, त्यानंतर फ्रेंच सरकारने स्टेलांटिस ग्रुपच्या या ब्रँडविरुद्ध कठोर कारवाई करण्यास सांगितले. सिट्रोएनने पहिल्यांदाच म्हटले आहे की ग्राहकांनी एअरबॅग बदलेपर्यंत त्यांच्या गाड्या चालवणे थांबवावे.
ताकाटा एअरबॅग घोटाळा
ताकाटा एअरबॅग घोटाळा २०१४ पासून सुरू आहे आणि आतापर्यंत जगभरात डझनभर लोकांचा मृत्यू झाला आहे. या सदोष तंत्रज्ञानामुळे फ्रान्समध्ये आतापर्यंत १३ जणांचे प्राण गेले आहेत. टोयोटा, निसान, बीएमडब्ल्यू आणि फोक्सवॅगन सारख्या मोठ्या कंपन्यांनी या कारणास्तव लाखो गाड्या परत मागवल्या आहेत. सिट्रोएनचे सीईओ झेवियर चार्डन यांनी स्पष्टपणे सांगितले की, “दुरुस्तीचे काम जलद व्हावे म्हणून आम्ही गाड्या न चालवण्याचा सल्ला दिला आहे.”
आता प्रश्न असा आहे की, भारतातील C3 मालकांनी काळजी करावी का? C3 व्यतिरिक्त, सिट्रोएन भारतात EC3, बेसाल्ट, C5 एअरक्रॉस आणि एअरक्रॉस सारखे मॉडेल देखील विकत आहे, परंतु आतापर्यंत सिट्रोएन इंडियाकडून कोणताही स्टॉप ड्राइव्ह अलर्ट आलेला नाही किंवा कोणतीही रिकॉल नोटीस जारी केलेली नाही.
भारतातही धोक्याची घंटा आहे का?
सध्या भारतात C3 चालवणाऱ्या ग्राहकांना घाबरण्याची गरज नाही, परंतु सावधगिरी बाळगणे खूप महत्वाचे आहे. जर तुम्ही C3 चालवत असाल तर कंपनीची वेबसाइट, सोशल मीडिया आणि बातम्यांवर नियमित लक्ष ठेवा. जर कोणत्याही प्रकारची अधिकृत रिकॉल नोटीस आली तर त्याकडे दुर्लक्ष करू नका.