India Costliest Car Number : हरयाणामध्ये बुधवारी एक ऐतिहासिक घटना घडली. एका कारसाठीचा VIP नंबर ‘HR88B8888’ तब्बल ₹1.17 कोटींना विकला गेला. भारतात यापूर्वी इतक्या महागड्या दरात वाहनाचा रजिस्ट्रेशन नंबर कधीच विकला गेला नव्हता.
हरयाणा सरकार दर आठवड्याला ऑनलाईन पद्धतीने VIP किंवा फॅन्सी नंबरची लिलाव प्रक्रिया आयोजित करते. शुक्रवारी संध्याकाळी 5 वाजता ते सोमवारी सकाळी 9 वाजेपर्यंत बोली लावण्यासाठी अर्ज स्वीकारले जातात. त्यानंतर बुधवार संध्याकाळी 5 वाजेपर्यंत सुरू राहते थरारक बोली! संपूर्ण प्रक्रिया अधिकृत पोर्टल fancy.parivahan.gov.in वरच पार पडते.
45 जणांची बोली, बेस प्राइस ₹50,000 → शेवट ₹1.17 कोटी!
या आठवड्यातल्या लिलावात ‘HR88B8888’ या नंबरवर सर्वाधिक म्हणजे 45 बोलीदारांनी अर्ज दाखल केले.
- बेस प्राइस: ₹50,000
- 12 वाजता किंमत पोहोचली: ₹88 लाख
- शेवटचा हात: ₹1.17 कोटी
फक्त काही तासांत बोली लाखोंवर जाऊन कोट्यवधींपर्यंत पोहोचली आणि हा नंबर देशातील सर्वात महागडा वाहन नंबर बनला.
गेल्या आठवड्यात ‘HR22W2222’ हा नंबर ₹37.91 लाखांमध्ये विकला गेला होता.
‘HR88B8888’ नंबर एवढा खास का?
या नंबरचे वेगळेपण अगदी स्पष्ट!
- HR – हरयाणा राज्य कोड
- 88 – संबंधित RTO कोड
- B – वाहनाचा सिरीज कोड
- 8888 – चार वेळा आलेले आठ अंक
कुतूहल वाढवणारी गोष्ट म्हणजे, मोठ्या अक्षरातील ‘B’ हे आकृतीने ‘8’ सारखे दिसते, त्यामुळे हा संपूर्ण नंबर सततच्या आठ आकड्यांचा आकर्षक पॅटर्न देतो. त्यामुळेच बोलीदारांनी हा नंबर मिळवण्यासाठी करोडोंची जोखीम घेतली.
केरळमध्येही 46 लाखांचा नंबर घेणारा अब्जाधीश
एप्रिल महिन्यात केरळमधील टेक अब्जाधीश वेनू गोपालकृष्णन यांनी त्यांच्या Lamborghini Urus Performante साठी ‘KL 07 DG 0007’ हा VIP नंबर ₹45.99 लाखांना विकत घेतला होता.
- सुरुवातीची बोली: ₹25,000
- शेवटचा दर: ₹45.99 लाख
‘0007’ हा नंबर जेम्स बॉण्डच्या आयकॉनिक कोडशी साधर्म्य दाखवतो, त्यामुळे त्याच्या कारला मिळालेली “एक्सक्लुझिव्ह” ओळख आणखी गडद झाली.