‘सीता-गीता’सारख्या दिसणाऱ्या भारतातील प्रसिद्ध कार सुरक्षेच्या बाबतीत ठरल्या सर्वात कमकुवत!

Maruti Baleno Toyota Glanza safety rating : भारतीय ऑटोमोबाईल मार्केटमध्ये सध्या ‘सुरक्षा’ (Safety) हा शब्द परवलीचा झाला आहे. जेव्हापासून ‘भारत NCAP’ (Bharat NCAP) सिस्टीम लागू झाली आहे, तेव्हापासून अनेक गाड्यांना ४ किंवा ५ स्टार रेटिंग मिळत असल्याचे आपण पाहत आहोत. मात्र, जागतिक स्तरावर मानल्या जाणाऱ्या ‘ग्लोबल NCAP’ (Global NCAP) कडून नुकताच एक असा अहवाल समोर आला आहे, ज्याने भारतीय ग्राहकांमध्ये खळबळ उडवून दिली आहे. भारतात प्रचंड लोकप्रिय असलेल्या मारुती सुझुकी बलेनो (Maruti Suzuki Baleno) आणि टोयोटा ग्लँझा (Toyota Glanza) या गाड्यांच्या सुरक्षिततेबाबत गंभीर प्रश्नचिन्ह निर्माण झाले आहे.

नेमका प्रकार काय आहे?

खरं तर, दक्षिण आफ्रिकेच्या बाजारपेठेत विकल्या जाणाऱ्या Toyota Starlet या कारची ग्लोबल NCAP ने क्रॅश टेस्ट घेतली. या टेस्टमध्ये या कारला चक्क शून्य (Zero) स्टार रेटिंग मिळाले आहे. आता तुम्हाला प्रश्न पडला असेल की ‘टोयोटा स्टारलेट’चा भारताशी काय संबंध? तर याचे उत्तर असे आहे की, भारतात विकली जाणारी मारुती बलेनो हीच गाडी टोयोटा ‘स्टारलेट’ म्हणून दक्षिण आफ्रिकेत आणि ‘ग्लँझा’ म्हणून भारतात विकते. थोडक्यात, या तिन्ही गाड्यांचे इंजिन, प्लॅटफॉर्म आणि डिझाइन एकच आहे.

हेही वाचा – गिअर बदलण्यासाठी आता क्लचची गरज नाही! Honda ची क्रांतिकारी NX500 भारतात लाँच

सुरक्षेच्या बाबतीत इतका मोठा फरक का?

सर्वात बुचकळ्यात टाकणारी गोष्ट म्हणजे, याच मॉडेलला भारताच्या ‘भारत NCAP’ टेस्टमध्ये ४ स्टार रेटिंग मिळाले होते. मग ग्लोबल NCAP मध्ये ही गाडी फेल का ठरली? अहवालानुसार, टेस्टसाठी वापरलेल्या मॉडेलमध्ये केवळ दोन फ्रंट एअरबॅग्स होत्या. गाडीचा ढाचा (Structural Integrity) धडकेचा वेग सहन करण्यास असमर्थ ठरला. बाजूने होणाऱ्या धडकेत (Side Impact) ही कार प्रवाशांना कोणत्याही प्रकारचे संरक्षण देऊ शकली नाही, परिणामी तिला शून्य रेटिंग देण्यात आले.

क्रॅश टेस्टचे धक्कादायक निष्कर्ष:

ग्लोबल NCAP ने आपल्या अहवालात काही महत्त्वाचे मुद्दे मांडले आहेत:

• स्ट्रक्चरल सेफ्टी: समोरून होणाऱ्या धडकेत ड्रायव्हरच्या डोक्याचे संरक्षण समाधानकारक असले, तरी गुडघ्यांच्या सुरक्षिततेबाबत रेटिंग अत्यंत खराब आहे.
• साइड इम्पॅक्ट: कारमध्ये साइड कर्टन किंवा चेस्ट एअरबॅग्स नसल्यामुळे बाजूने होणाऱ्या अपघातात प्रवाशांच्या जीवाला मोठा धोका असल्याचे स्पष्ट झाले आहे.
• चाइल्ड सेफ्टी: लहान मुलांच्या सुरक्षिततेच्या बाबतीत कारला ४९ पैकी केवळ २९.३३ गुण मिळाले आहेत, जे समाधानकारक नाहीत.

मारुती आणि टोयोटाची ‘मैत्री’ वादात?

२०१९ मध्ये जेव्हा टोयोटाने मारुतीसोबत भागीदारी करून ‘ग्लँझा’ लाँच केली, तेव्हापासून या दोन गाड्यांना ‘सीता-गीता’ म्हटले जाते. मारुतीला मोठ्या कारच्या सेगमेंटमध्ये आणि टोयोटाला हॅचबॅक सेगमेंटमध्ये स्थान मिळवण्यासाठी ही युती फायदेशीर ठरली. मात्र, आता सुरक्षेच्या निकषांवर या दोन्ही कंपन्यांच्या गाड्या अपयशी ठरल्याने सोशल मीडियावर त्यांच्यावर टीका होत आहे.

कंपन्यांची प्रतिक्रिया

टोयोटाने ग्लोबल NCAP ला आश्वासन दिले आहे की, ते दक्षिण आफ्रिकेच्या बाजारपेठेसाठी कारच्या सेफ्टी फीचर्समध्ये सुधारणा करतील. मात्र, जोपर्यंत कारच्या मूळ ढाच्यामध्ये (Chassis/Structure) बदल होत नाही, तोपर्यंत केवळ एअरबॅग्स वाढवून सुरक्षा खरोखर वाढणार का? हा मोठा प्रश्न आहे.